Ardo inportatzaile japoniarren alderantzizko misioa

Ekainaren 28tik uztailaren 2ra Arabako Merkataritza eta Industria Ganberak Alderantziko Misioa antolatu du Arabako Errioxan, non Japoniatik etorritako zazpi ardo inportatzailek parte hartu duten. Arabako Foru Aldundiaren laguntzarekin sustatutako ekimena INTERKOOP programaren esparruan kokatuta dago eta Arabako enpresa txiki eta ertainen nazioartekotzea bultzatzea du xede, kanpoko merkatu berrietara iritsi daitezen.

Bost egunez, ekimenean parte hartu duten upategiak zein inportatzaileak laguntzeko lanak egin ditu Ganberak: bi alderdien arteko lotura lanetan aritu da, merkataritza arloko lankidetza eta topaketarako ingurumen aproposa sortzeko. Parte hartzaileek lehen eskutik ezagutu dituzte Arabako Errioxaren ezaugarri bereziak eta ardo horrek nazioartean prestigio handia izateko arrazoiak.

Programari amaiera emateko, eskualdeko upategi batzuk bisitatu dituzte, non inportatzaileek zuzeneko bilerak izan dituzten ekoizleekin; gainera, ardoa egiteko metodoak ezagutu dituzte eta Arabako ardoaren berezitasuna, kalitatea eta aniztasuna erakusteko diseinatutako dastatzeak egin dituzte. Jarduera horiei esker negozio aukera berriak zabaldu dira eta bi alderdien arteko merkataritza-harremanak sendotu.

Misioa INTERKOOP programaren barruan kokatzen da. Arabako Ganberaren eta Foru Aldundiaren baterako ekimena da, eta lurraldeko ETEei laguntza integrala eskaintzen die, bai banaka, bai nazioartean lehiakortasuna indartzen duten lankidetza proiektuen bidez.

Arabako Ganberak eskerrak eman nahi dizkie bai inportatzaile japoniarrei bai Arabako upategiei beren inplikazio, profesionaltasun eta harrera onagatik. Alderantzizko misio honi esker Arabako Errioxaren posizionamendua sendotu da Asiako merkatuan.