Arabako industria-ekoizpena pixka bat igo da neurrizko eskariaren testuinguruan

Laugarren hiruhilekoan jarduera hobetu egin da, eskabide-zorroak aurrerapen esanguratsurik ez erregistratu arren.

Gasteiz, 2026ko otsailaren 26a- Laugarren hiruhilekoan ekoizpen-jarduera espero zena baino handiagoa izan da, eta horrek neurrian optimistak diren aurreikuspenak iragartzen ditu hurrengo hilabeteetarako, nahiz eta oraingoz eskabide-zorroaren egoeran aldaketarik egon ez den. Abenduaren amaieran, enpresen % 62k uste dute haien eskabide-zorroa handia edo aproposa dela, eta fabrikatutako produktuen stockak murriztu egin dira. Hala, urtarrila eta martxoa bitarterako ekoizpen-aurreikuspenak positiboak dira. Horren ondorioz, Industria Konfiantza Adierazlea 2,46 puntutan kokatu da..

Epe laburreko aurreikuspenen arabera, ekoizpena, eskabide-zorroa eta salmentak areagotu egingo dira, eta esportazioak zein enplegua pixka bat murriztuko dira.

Urteko laugarren hiruhilekoaren emaitza aurreko hiruhilekoa baino ekoizpen-jarduera garbi handiagoa izan da. Ekoizpena handitu egin da hilabete batetik bestera enpresen % 42n. Bestalde, enpresen % 45ek egonkor mantendu du, eta azkenik, % 13k ekoizpena murriztu egin du.

Urritik abendura bitartean, barne eskabide-zorroak beherakada txikia jasan du, kanpo eskabide-zorroa, aldiz, egonkor mantendu da aurreko hiruhilekoarekin alderatuta. Arabako industria-enpresen eskabide-zorroa, guztira, egoera berean mantendu da. Konpainien % 62rentzat egokia edo handia da beren eskabide-zorroa guztira. Era berean, enpresen % 38k beren eskabide-zorroa murriztu dela igarri dute. Epe ertainean, enpresek eskariaren gorakada posiblea aurreikusten dute.

Eskari-kopurua (kanpokoa batik bat) eta eskulan espezializatuaren zailtasunak izan dira kausa nagusiak ekoizpen-ahalmena gehiago ez erabiltzeko.

Barne-merkatuari esker, urteko laugarren hiruhilekoan industria-salmentak igo egin dira aurreko hiruhilekoaren aldean. 2025eko laugarren hiruhilekoan, Arabako industria‑enpresen % 56ren salmentek gora egin dute, enpresen % 14renak jaitsi dira, eta gainerako % 31k egonkor mantendu dituzte.

Bestalde, inbertsioek jaitsiera garbia izan zuten. 2025eko urria eta abendua bitartean, Arabako industria-enpresen % 9k inbertsioak handitu dituzte, % 49k murriztu, eta gainerako % 42k egonkor mantendu dituzte.

Hurrengo hilabeteetarako aurreikuspenak

Hurrengo hilabeteetarako aurreikuspenei dagokienez, Arabako industria-enpresen ekoizpenak, eskabide-zorroak eta salmentek gora egingo dute, eta esportazioak zein enplegua pixka bat murriztuko dira 2025eko laugarren hiruhilekoaren aldean.

• Enpresen % 45ek ekoizpena handitzea espero dute; % 40k mantentzea, % 15ek jaistea.
• Enpresen % 24ren arabera, eskabide-zorroak gora egingo du, % 61ek mantenduko dela uste dute, eta % 15ek murriztuko dela.
• Enpresen % 43ren salmentak handituko dira; % 15ek jaitsiko direla aurreikusten dute, eta gainerako % 42k egonkortasuna espero dute.
• Esportazioei dagokienez, % 2k igoera espero dute, galdetutako enpresen % 14k, berriz, murriztuko direla uste dute. Gainerako % 84 kanpoko salmentak mantenduko direlakoan daude.
• Landunei dagokienez, enpresen % 2k langile-kopurua handituko dute, eta % 89k egonkor mantenduko dute. Bestalde, % 10ek kopurua murriztu egingo dute.

2026ko urtarrilean, 91 enpresari egin zaie 2025eko laugarren hiruhilekoaren Industria Koiunturaren Inkesta, eta, horren arabera, 4.839 langile daude.